قالوا كان عيل وراح
خد له كام شلوت وراح
آهووو استراح
كان عمره كام؟؟؟
أصله كان حتة صباح
الواد نزل من بيته جري
من حضن ابوه وامه وجري
راح ع العلام
المدرس القدوة قال
وروني الواجب يا عيال
والواد ماجبش..
ايه النظام؟
وريني واجبك أوام يا زفت
الواد سكت..
ليه مايجاوبش؟
مافيش كلام
المدرس قام بواجبه
ع الواد وضربه
منطق ماحطش
سكت الكلام
كان حلم ابوه يطلع طبيب
لم الفلوس للواد وبعته
ع المدرسه ودوغري وقال له
ياللا أوام
نفسي يا بني في حاجات كتير
نفسي اشوفك يا واد كبير
ابوك هيعيش ويموت صغير
وانت المنام
انت المنام والحلم انت
انت الأمل ياواد وانت
حياتي انت وبكره انت
ع الحلم ده بصحى وبنام
جه المدرس العبوس
والحلم ده اصبح كابوس
الواد في لحظه صار عجوز
وآهو نام ما قام
باعتين عيالنا عشان تموت
واحنا نموت
ولا لينا ديه ولا لينا صوت
وسط الزحام
الخوجه ده ضميره مات
والحلم مات
وآهو يوم وفات
وكله تمام
رخص التراب ما بقينا احنا
على كل مركب جينا ورحنا
اتحوجنا فبعنا روحنا
والسعر كام؟
جميع الحقوق محفوظة-سمر طاهر-2008
