الخامسة عصرا
ياااااه النهارده صاحي من النوم بدري عن كل يوم....شكلها بقت الساعة 4 العصر...يالا فاتني صلاة الضهر...المهم هلحق العصر النهارده... بس كمان شويه لسه ساعتين ع العشا...قصدي المغرب. الواحد دماغه خرمانة.. يمكن من الصيام؟؟
الخامسة ونصف
الواحد ريقه ناشف... أما أدخل اغتت ع الست امي في المطبخ..... ايه يا حاجّه الروايح اللي تفتح النفس دي؟؟؟ ملووووخية.. يا ولددد، بس طبعا مالحقتيش تعملي الحلو، النهارده وامبارح وأوله...3 ايام يا ست يا مفترية مفيش حتة كنافة ولا قطايف.....اساعدك نعمل كنافه؟؟! اساعدك ايه يا حاجه انا قادر أصلب طولي... انا عندي مذاكره، انتو هتستهبلوا فيها واللا ايه؟؟؟ده انا يجوز لي الفطار، عندي عذر، مش بذاكر يا بني ادميين.... ايه اذاكر واصوم واساعدك كمان؟؟! لييييييه؟؟؟
السادسة إلا خمسة
هنزل اجيب سجاير عشان بعد الفطار ما ضيعشي وقت...ايه اجيبلك لفة قمر الدين من ابراهيم البقال.... ليه انا الشغاله بتاعتكم؟؟ طب مش نازل... نهار ابيض آدي المغرب أذن والعصر ضاع ع الواحد وكله م الرغي بتاعكم.... ياللا بعد الفطار ابقى اصليهم مع المغرب... ولو ان الملوخية هتكبس على مراوحي.....
السادسة وربع
حد يعمل ملوخية وصابح صيام وعطش وحر... انا محدش بيعمل لي حساب في البيت ده خالص؟؟؟؟ انا حاسس اني هفأ..... حد يقلب القناه، ايوه هاتوا otv ،تامر وشوقية هتبدأ.... لأ لسه فاصل.. اقلبوا العيادة ع القناة الأولى بتاعتنا، اقلب ياض يا محمود، امال ابويا وامي خلفوك على كبر ليه ياض؟؟؟إعمل حاجه ياض... اما اقوم احسن جالي اسهال من ام الملوخية....
السابعة مساءا
آآآآه الواحد كده ارتاح....حد يولع ع الميّه عشان الشاي، اتحركي يا بت يا مرفت، امال الواحد له اخت ليه..... واللا بقولكو ايه هغور من وشكوا واشرب الشاي ع القهوة.... ياللا سلام....
الواحدة بعد نص الليل
يا نهار ابيض يا واد يا محسن تلات ساعات يا ابن اللعيبة بتلاعبني طاولة أما ريق امي نشف وسففتني 7 شاي... اما اطلع افتح لي كتاب واللا اصلي لي ركعتين، من الصبح ما ركعتهاش.....
الثانية صباحا
إوعى وشك... ايه يا بت يا مرفت المُزّه اللي في التلفزيون دي، دي السهرة هتحلو.... يا خساااارة يا بت يا مرفت يا فقرية النور قطع... الواحد يشرب له سيجارة في الشباك....
الثالثة صباحا
ده الفجر قرّب يدّن يا ولاد الأيه يا بتوع الكهربا..... ايش حال ما كنشي عندنا مذاكره...
الثالثة وثلث صباحا
قشطة النور جه، ايه ده عمرو خالد، لأ نبقى نشوفه في الإعاده الصبح...... حد يقلب أي حاجه، شريف ونص شريف ونص.. أي حاجه...اقلبي يا بت القرف ده، ايوووه هاتي العياده كت حلوه النهارده نشوفها تاني ورانا ايه..هاه هاه هااااااه
الرابعة إلا ثلث صباحا
صحي امك يا بت وحضروا السحور...ايه ده فوول؟؟؟بطننا ورمت م الفول، كويس فيه بيض مقلّب؟؟؟ سيبي البيضة يا بت يا مرفت..... هتخلص الفول يا محمود، هو انت صايم ياض...سيب الفول......
الرابعة وربع صباحا
سامعين يا عيال، أهو الفجر أذّن أهوه....صوت الحاج أحمد... مستعجل أوي يا حاج أحمد....الواحد ما لحقشي يحبس حته بكباية شاي.....طب كنت استنى 3 دقايق نصلي ركعتين واللا حتى العِشا..... ياللا بُكره اليوم طويل... طفوا النور واتخمدوا يا عيال....
